frétt

Með vel reimaða takkaskó í seinni hálfleik

Mér finnst einhvern veginn eins og fyrri hálfleik sé lokið í baráttunni við COVID 19 veiruna.  Og heilt yfir litið tókst okkur vel til og við erum yfir í leiknum.  Vissulega urðum við Hvergerðingar fyrir miklu áfalli vegna fráfalls góðra hjóna hér í bæ og margir urðu mikið veikir.  En að teknu tilliti til þess hversu fáir létu lífið á Íslandi miðað við víða annars staðar út í heimi, þá getum við mjög vel við unað.

 Landið virðist vera nær smitlaust og daglegt líf að komast í samt lag.  Heimsóknarbanni hefur nú algjörlega verið aflétt af hjúkrunarheimilunum og þá komast allir í crossfit, sem það kjósa.  Þetta hefur tekist með feikn samstilltu átaki allra sem að þessum málum koma.  Til að móðga nú engan, til dæmis ónafngreinda vísindamenn, þá vil ég nota tækifærið og þakka ÖLLUM þeim sem hafa komið að framangreindum málum kærlega fyrir þeirra góða framlag.  Samvinna og samkennd eru orð sem koma fyrst upp í hugann, svona fljótlega á eftir handþvotti.

 En eins og áður sagði, þá tel ég að við séum í hálfleik.  Seinni hálfleikur hefst líklega þegar ný smit greinast við komu erlendra ferðamanna til landsins, væntanlega í lok júní.  Þá ríður á að við séum aftur tilbúin í leikinn, sem er reyndar ekki leikur, heldur dauðans alvara.  Njótum hálfleiksins en verðum tilbúin með vel reimaða takkaskó, og hreinar hendur þegar sá seinni hefst.

 

Kveðja og góða helgi,

Gísli Páll, forstjóri Grundarheimilanna